Txis mej koob thiab cob tshoob kos

Zaj txiv thej com los yog nus tij hais thaum muab plaub tug mej koob sib txis ua txij nkawm ntos niam txiv tshoob kos.

1. Hais! Zoo li kus yuas zoo li kus zoo li thawj chiv thiaj tseg tau txiv tuam mej koob lwm chiv tsum tseg tau txiv lwm mej mus hwb xyw zoo li nej plaub tug txiv tuam mej koob lwm mej koob nej ib leeg nyob ib tog zej ib leeg nyob ib tog zos kuv niam kuv txiv tom ub tom no luag yuav phwb tshoob ces luag yuav nrig cwj lis tawv tuaj thov nej lub zog txog.

- Zoo li nej ib leeg nyob ib tog zej ib leeg nyob ib tog zug kuv niam kuv txiv tom ub tom no luag yuav phwb tshoob ces luag yuav nrig cwj lis tawv tuaj thov nej lub zog txug.

2. Zoo li nej plaub tug txiv tuam mej koob lwm mej koob nej tuaj txog lis ntua nej tsuas zoo tam tau tus ntoo maj ntoo tov txawm tuaj ruab roob kuv niam kuv txiv tom ub tom no yuav zoo tam tau tus noog liaj noog luv yuav ya tuaj mus ua qhov chaw poob.

- Zoo li nej plaub tug txiv tuam mej koob lwm mej koob nej tuaj txog lis ntua nej yuav zoo tam tau tus ntoo maj ntoo tov txawm tuaj ruab dawg kuv niam kuv txiv tom ub tom no yuav zoo tam tau tus noog liaj noog luv yuav ya tuaj mus ua qhov chaw tsaws.

3. Zoo li wb txiv thej com txiv kav xwm muab kuv niam kuv txiv tom ub tom no tus cwj tshoob rau nej tuav ces tuav kom ncaj muaj tus cwj kos rau nej nkaug ces nkaug kom ncee tsam nej tuav cwj tshoob tuav tsis ncaj nkaug cwj kos nkaug tsis ncee nej los tsis txhob muab kuv niam kuv txiv tus cwj tshoob cwj kos nkaug lis nkuav mus rau ruab mab, ntshe wb txiv thej com txiv kav xwm yuav ntxuav tes ntxuav taw pluj plias mus nce tsag nej tsis txhob los thab txog wb txiv thej com txiv kav xwm tus phij tshawm los xeeb kab wb yuav tsis paub nrog nej pheej phiaj pheej phom nyob rov hais tag.

- Zoo li wb txiv thej com txiv kav xwm muab kuv niam kuv txiv tom ub tom no tus cwj tshoob rau nej tuav ces tuav kom ncaj muaj cwj kos rau nej nkaug ces nkaug kom ncee tsam nej tuav cwj tshoob tuav tsis ncaj nkaug cwj kos nkaug tsis ncee los nej tsis txhob muab kuv niam kuv txiv tus cwj tshoob cwj kos nkaug lis nkuav mus rau ruab sua, ntshe wb txiv thej com txiv kav xwm yuav ntxuav tes ntxuav taw pluj plias mus nce tsua nej tsis txhob los thab txog wb txiv thej com txiv kav xwm tus phij tshawm los xeeb qhua wb yuav tsis paub nrog nej pheej phiaj pheej phom nyob rov hais dua.

4. Zoo li nej tuav kuv niam kuv txiv tom ub tom no tus cwj tshoob ces tuav kom ruaj tsis txhob muab cwj tshoob cwj kos tso lis pluav mus xyaw luaj kuv niam kuv txiv tom ub tom no rooj tshoob rooj kos thiaj tsis raug luag luag kom nkauj nyab nraug vauv thiaj li ua lub neej niaj txhiab ib txhis tsis to txoj niag kev quaj.

- Zoo li nej tuav kuv niam kuv txiv tom ub tom no tus cwj kos ces tuav kom zoo tsis txhob muab cwj tshoob cwj kos tso lis pluav mus xyaw av kuv niam kuv txiv tom ub tom no rooj tshoob rooj kos thiaj tsis raug luag xyav kom nkauj nyab nraug vauv thiaj li ua lub neej niaj txhiab ib txhis tsis to txoj niag kev fav no yuas nej plaub tug txiv tuam mej koob lwm mej koob.