Sib Hlub Thaum Tseem Nyob

Peb ua neej yuav tsum sib hlub

Txhob sib ntxub thiab txhob sib ceg

Txhob lam peg yus tus poj niam

Ua ib tiam niam txiv tsis ntev

Yam txoj kev twb yuav sib faib

Txhob lam saib yus tus me tav

Zoo li av tsis xav cog qoob

Tsam ib hnub lub ntuj ho hu

Ces ib tug ho tau ncaim mus

Ces ntshe yus ho yuav kho siab

Piav lub ntsiab txog yav thaum ub

Yawg vam tub coj lub siab nqaim

Niam hlob ncaim yawg thiaj tsis pom

Me nyuam xyom los yawg tsis pub

Vim yawg ntxub yawg tus poj niam

Tom qab xiam tau peb hli xwb

Hlob lub hlwb mam tig rov qab

Ces yog nyab twb ploj mus lawm

Me nkauj ntxawm los tseem mos liab

Hlob lub siab mam rov nco txog

Yav tag los poj niam tseem nyob

Me thiab loj muaj nws nrog ua

Tseev hnyuv npua tseev os tseev qaib

Hlob tig saib twb tsis nco txhawj

Hlob mus work los txog ces nyob

Ces niam hlob twb ua txhua yam

Thiaj muab tham ua lus paj huam

Rau tus muam hu ua jennifer

Muab hais tawm thiaj li muaj kuab

Tuaj mus khuab rau cov txiv neej

Ua nej pheej coj lub siab qub

Ua siab dub tsis hlub poj niam

Coj lim hiam nruab hnub hmo ntuj

Nej poj kuj yog neeg ib yam

Txhob tawm tsam rau koj tus hlub

Tsam ib hnub koj xav txog lig

Mam rov tig ces nws twb ploj

Xav kom koj ho xav hais tias

Thaum mus ntxias koj hais li cas

Thiab nws mas ntsa npaum hnub ci

Tsis yog li koj yeej tsis yuav

Luag tias quav los koj tias yuav

Koj thiaj yuav nws ua koj poj

Yuav tsum coj lub siab kom ntev

Ua txiv tsev hlub cov niam tub

Yuav tsum hlub thiaj li tsim nyog

Luag los nrog koj nyob ib tiam

Tus poj niam uas koj tsis hlub

Muaj ib hnub koj yuav nco nawb

Ua siab dawb coj lub siab dav

Pub rau hnav kom kawg siab ntsws

Txhob lam plhws tuaj ntawm daim tawv

Hauv nruab plawv mas koj ntxub tshaj

Thiaj muab faj rau nej txhua leej

Tsoom txiv neej thiab tsoom viv ncaus

Lo lus xaus thov nej sib hlub

Txhob sib ntxub thiaj li tsim nyog

Qhov koj yog nws ib leeg niam

Daim ntawv tiam nws yog koj txiv

Lub neej chiv neb twb sib hlub

Muaj me tub me ntxhais puv tsev

Ua siab ntev sib hlub mog hmoob

Txhob tos hnub ib tug siav tu

Mam los hu thiab quaj tsuj tshiv

Me koj txiv thov sawv rov qab

Kuv me nyab thov sawv rov los

Kuv tos tos koj os honey

Ces yuav nkim koj tej me zog

Vim nws nrog koj tham tsis tau

Thiaj muab sau tuaj qhia sawv daws

Thov nej khaws zaj paj huam no

Coj mus kho nej lub neej mog