Paj lus hmoob

Paj lus hmoob

1. Av luaj tawg plo, sawv hlo, Av luaj tawg nrees, sawv tsees

- Nyob muaj niam muaj txiv, muaj kwv muaj tig, muaj tsa, tsis yog tawm hauv qhov av los.

2. Cwj qhaub nyob deb, cwj tsiag nyob ze.

- Tus neeg yus xyav nws moo nyob deb, tab sis nws muaj phooj ywg nyob ze.

3. Hais kom muaj teg, txawb kom muaj qab.

- Hais lus dab tsis yuav tsum hais kom muaj chaw txawb chaw rau, thiaj ruaj ntseg tau li lub khob uas muaj lub qab .

4. Hais nruab zoo nrov nruab tsuag, hais hauv tsev ncha saum luag.

- Hais lus yuav tsum hais lo zoo xwb, txhob hais luag lwm tus dab plig. Txhob xav tias yus hais yus xwb ces luag tsis hnov.

5. Hauv mis koj xwb noj, hauv tsoos koj xwb hnav.

- Koj yog tus hlob, tus laus taws, tus paub tus pom dua.

6. Hlau txias ntaus tsis zuav, lus txias hais txhob yuav.

- Lus dab tsi hais tas lawm mas tas li, tsis txhob muab rov los hais kom ua chaw chim.

7. Hla dej yuav hle khau, tsis teb yuav hle hau.

- Ua Nom ua Tswv, yog khiav mus nyob rau lwm qhov chaw ces tus Nom yuav poob mus.

8. Hluav taws kub txog twg, thov muab dej twg tua.

- Muaj plaub muaj ntug, muaj xaiv muaj lus, mus sib hais hauv tus nom-tswv twg, xav kom tus nom ntawd muab hais kom tiav.

9. Muaj txab muaj tsheej sab, muaj txim muaj tsheej tim.

- Yuav muaj lub txim, los yuav tsum kom muaj qhov phua tau tias txhaum tiag thiab muaj pov thawj pom .

10. Ncauj hub, ncauj rhawv txhaws tau, ncauj leej tib neeg txhaws tsis tau.

- Muaj lus phem lus zoo txhob lam tau lam hais qhia luag lwm tus, nws yuav coj mus rhuav lawm tom ntej.

11. Noj tsis taus yuav tuag, hais tsis taus yuav swb.

- Tsis noj ces xav ua neeg nyob los yeej yuav tuag, tsis muaj cuab kav hais ces xav yeej npaum twg los yuav swb xwb.

12. Noj zaub tsib hno tsuag los qab tseej nqaij, haus dej qab tsheej cawv.

- Noj sib hlub haus sib cev, txawm qab txawm tsuag los qab.

13. Nplooj tsawb tsis yog npuag, nciab tsis yog kwv luag.

- Luag hais los yog ua dab tsis, yuav tsum txhob ntseeg tas tas, luag ntxias yus xwb.

14. Nplooj tsis zeeg, zoov tsis kaj.

- Yog tsis ua, tsis hais, tsis mus, tsis tuag ces tsis tag.

15. Nrab neeg hais nrab lus, me neeg hais me lus.

- Yus hais lus, yus ua dab tsi, yus yuav tsum ntsia yus saib zoo li cas.

16. Ntov ntoo yuav tsum saib ceg qhuav.

- Yuav hais luag dab plig, yuav tsum saib luag puas nyob ze tso.

17. Paub hnub muaj tsis paub hnub pluag, paub hnub nyob tsis paub hnub tuag.

- Ua neeg nyob, yuav tsum tsis txhob khav khav.

18. Phooj ywg tau kev dav, yeeb ncuab tau chaw ti.

- Ua neeg zoo ces mus txog qhov twg los muaj phooj muaj ywg ua neeg phem ces mus txog qhov twg los luag ntxub.

19. Puag luag tub tsaws dej dag, puag luag poj tuaj nruab txag.

- Ntxias luag mus ua lwm yam kom tau kev deev luag poj niam.

20. Puag luag tub tsaws dej ntab, nyiag luag qoob tuaj nruab txhab.

- Ntxias luag rau tej yas kab kom tau kev ua tub sab.

21. Qaib qus ua tsis nyog qaib dib, zaub mos ua tsis nyog zaub tsib.

- Tsa Nom tsa Tswv yuav tsum tsa tus sawvdaws paub zoo, tsis yog lam tau lam muab ib tug neeg tshiab uas tsis tau paub dua thiab tsis tau ua dhau los los ua Nom.

22. Suav tshuaj cia suav rhaub, Hmoob tshuaj cia Hmoob rhaub.

- Nyob lub teb chaws twg kom ua raws li lub teb chaws ntawd txoj kev cai lij choj.

23. Txoj cai luaj txoj plaub hau, txhua leej txhua tus hla tsis dhau.

- Yog ua raws kev cai mas txhaum loj txhaum me los yuav tsum kho.

24. Txawj ntos tsis qig ntxaiv, txawj lus tsig qig lus xaiv.

- Nom txawj txiav txim ces tsis qig lus.

25. Tsev nqeeb tsis zoo sim taws, tsev ruas tsis zoo sim zeb.

-  yuav los yog tsis ua tiag, tsis txhob lam zes.

26. hav ntuj ces qab ca qhuav, los nag ces qab ca ntub.

- Ua tub sab ces thaum luag txhom tsis tau ces luag, thaum luag txhom tau ces tuag.

- Thaum zoo siab ces luag ntxhi, thaum tsiv siab ces pos muag nti.

27. Ruaj cuag thaiv, thaiv cuag zeb ntsuab.

- Hais dab tsis yuav tsum hais kom tawv hais kom ruaj.

28. Vws txab vws liam, caws txab caws hiam.

- Koj tias koj tsis txhaum los cuaj leeg kaum leej pom tias txhaum ces yuav tsum txhaum.

29. Xyoob ib txoog, ntoo ib tsob, nqaij ib daig tawv ib phob.

- Yog yus ib tsev neeg, yog yus ib cuab.

30. 9 lub hnub tsis cuag ib lub hli, 9 leej tub tsis cuag ib leej txiv

- Muaj pem tsawg tus tub los yeej tsis cuag ib leej txiv