Nyab McDonald

Hnov luag ncav hais tias

Peb cov nyab tshiab

Yog nyab McDonald

Thov zam txim rau kuv thiab mog

Vim twb yog muaj tseeb thiaj hais

Rau cov ntxhais mus ua nyab tshiab

Coj lub siab li thaum hluas nkauj

Mus noj ncauj tim tej tab laj

Lub ntuj nkaj los koj tsis sawv

Npau nrov thawv thaum muaj neeg txib

Ua khib khib niam pog txiv yawg

Yeej tsis cawg tej nkauj tej muam

Nyab tseem yuam txiv yawg hlab mij

Nqa pepsi los rau nyab haus

Tseem tsis txaus nyab

Thiaj li tawm mus order tom McDonald

Number kaum with mountain dew

Tsaus ntuj zus tsis paub los tsev

Yam tus dev tsis paub chaw pw

Ua tsw tsw rau kwv rau tij

Nyab hlab mij ua tshais ua hmo

Yeej tsis nco txog tej kwv yau

Tias yuav tau npaj rau lawv noj

Thaum nyab noj puv nyab lub plab

Nkag hoob nab mus pleev make-up

Lawm tsheej tsam twj taig tsis ntxuav

Plhws qhov quav pw tsheej tag kis

Sawv lig lig thiab tseem cem tias

Vaj tse qias cas nej tsis cheb

Twb yog peb thiaj nrog nej nyob

Haj tseem cob rau koj tus txiv

Tias wb tsiv txhob nrog lawv nyob

Tsam kis mob ntawm ob niag laus

Niaj hnub ntaus tej me kwv yau

Nyab noj tsau ces tom txaj

Qhov rooj lock leej twg txhob khob

Tsam raug mob tsis txhob tu siab

Pleev khaub piav sawv ntxov tsaus ntuj

Noj nqaij nyuj thiab noj nqaij npua

Ces nyab xuas mus rau tom txaj

Rooj txag lock lawm tsheej tav su

Mam hnov hu tias los nqa tais

Kwv mus txais ces nqaij twb du

Kwv tseem xyu ces hnov nyab cem

Ntseg muag phem ntseg muag hu dab

Txawj tshaib plab cas koj tsis khwv

Noj nqaij xwv cas tseg nqaij rog

Yuam niam pog cheb vaj cheb tsev

Cem cuag dev tsis ntshai ntuj vau

Nti qaub ncaug qhov muag dub nciab

Niaj hnub ntiab kom kav tsij tawm

Tsuas hnov tsawm thiab tsuav hnov yws

Yog leej twg xav yuav kom coj

Hmoob noj loj thiab hmoob hu dab

Nyab tseem faj rau txiv yawg tias

Nyias noj nyias mam li ua nyias

Vim hais tias kuv tsis yog qhev

Siab tsis ntev los ua yug nej

Nyab da dej thiab pw tsheej hnub

Me nyuam kub nyab yeej tsis xauj

Ua hluas nkauj rau ub rau no

Yeej tsis nco yuav los tab cuab

Cov nyab xuab uas zoo li ko

Ooooiii... Nkauj hmoob nkauj hmoob

Kuv thov siv lub sij hawm no

Los mus kho peb cov nyab tshiab

Hloov dua siab mog cov me muam

Tsis txhob yuam tej niam tej txiv

Los ua txij rau yus cov qoob

Vim peb hmoob tsis coj li no

Vim peb hmoob tsis coj li no