Chiv tshoob - Cob kaus rau ob tug mej koob

Zaj no hais lub sij hawm thaum yuav sawv kev hauv niam pog txiv yawg tsev mus ua tshoob yog ob tub coj tshoob nres kos los yog txiv thej com hauv tsev hais cob lus thiab lub kaus rau ob tug mej koob kom nkawv ua siab ntev mus pab ntos tshoob ntos kos rau riam txiv

1. Hais! Zoo li kus zoo li txhia niaj mus txhia xyoo kuv niam kuv txiv tub nraug laj cev hlob tsis tiav txuj ces tub nraug laj tsis ntim txuj qas zias mus ncig ntuj mus nrhiav puj, xyoo no kuv niam kuv txiv tub nraug laj cev hlob mus tiav txuj ces tub nraug laj tsuas yuav ntim txuj qas zias mus ncig ntuj yuav tshwm rooj mus nrhiav puj yuas.

- Zoo li txhia niaj mus txhia xyoo kuv niam kuv txiv tub nraug laj cev hlob tsis tiav hluas tub nraug laj tsis ntim txuj qas zias mus ua qhua yuav nrhiav puas, xyoo no kuv niam kuv txiv tub nraug laj cev hlob mus tiav hluas ces tub nraug laj yuav ntim txuj qas zias mus ua qhua yuav tshwm rooj mus nrhiav puas.

2. Zoo li xyoo no kuv niam kuv txiv tub nraug laj ces yuav mus muab qab ntuj los ncig tas hauv ntuj los muab ncig thoob li mus suab tau hmoob yaj ncuab ntxhais nkauj lag tus cev soob.

- Zoo li xyoo no kuv niam kuv txiv tub nraug laj ces yuav mus muab qab ntuj los ncig tas hauv ntuj los muab ncig txog li mus suab tau hmoob yaj ncuab ntxhais nkauj lag tus cev mos.

3. Zoo li kuv niam kuv txiv tub nraug laj yuav mus suab tau hmoob yaj ncuab ntxhais nkaug lag ncig lis yeev los txog tim toj tshais roj lis nruam los txog kuv niam kuv txiv tej tom vaj kuv niam kuv txiv yuav nrug rooj lis das saib nrug ntsa lis das xyuas yuav pom tau kuv niam kuv txiv nkauj nyab nraug tub tus caj tshoob ntsis kos ntaug lis leev los puv tas kuv niam kuv txiv ib tog plaj.

- Zoo li kuv niam kuv txiv tub nraug laj yuav mus suab hmoob yaj ncuab ntxhais nkauj lag ncig lis yeev los txog tim toj tshais roj lis nruam los txog kuv niam kuv txiv tej tog tsev kuv niam kuv txiv yuav nrug rooj lis das saib nrug tsa lis das xyuas yuav pom tau kuv niam kuv txiv nkauj nyab nraug tub tus caj tshoob ntsis kos ntaug lis leev los puv tas kuv niam kuv txiv ib tog lev no ces kuv niam kuv txiv tus caj tshoob tawm li plaws qhov no tuaj tus ntsis kos tawm lis plaws qhov no los no yuas.

4. Zoo li neb txiv tuam mej koob lwm mej koob neb nyob neb cuaj ntxug kev sis zas kuv niam niam kuv txiv tub tsheej luj yim tsuas yuav nrig cwj lis ntawv tuaj thov lawm neb lub zog tas.

Zoo li neb txiv tuam mej koob lwm mej koob neb nyob neb cuaj ntxug kev sis zus kuv niam kuv txiv tub tsheej luj yim tsuas yuav nrig cwj lis ntawv tuaj thov neb lub zog txug.

5. Zoo li neb xav tias neb tsis tuaj los kuv niam kuv txiv tub tsheej lúj yim khuj thawj mus thov tim muaj.

Zoo li neb xav tias nej tsis khiav los kuv niam kuv txiv tub tsheej luj yim khuj thawj mus thov tim cia.

6. Zoo li neb ntauj lis ntsaws nqes tuaj txog kuv niam kuv txiv tej mus qab cub kuv niam muaj zoo ib lub siab ces kuv niam yuav sawv lis tsees tuaj nrog qhub.

- Zoo li neb ntauj lis ntsaws nqes tuaj txog kuv niam kuv txiv tej mus qab cais kuv txiv muaj zoo ib lub plawv ces kuv txiv yuav sawv lis tsees tuaj nrog hais.

7. Zoo li kuv niam ces yuav sab laj tuaj tom taj sab laj ua qas tsis sab laj lis zus ua nqaij ua hno rau neb noj kuv txiv ces yuav sab laj lis zus tso lis pluav nws nkauj nyab nraug tub liaj lwg rhwv mim txoj kab tshoob kev kos rau neb coj.

- Zoo li kuv niam ces yuav sab laj tuaj tom taj sab laj ua qas tsi sab laj lis zus txo dej txo cawv rau neb haus kuv txiv ces yauv sab laj lis zus tso lis pluav nws nkauj nyab nraug tub liaj lwg rhwv mim txoj kab tshoob kev kos rau neb taug no.

8. Zoo li kuv niam kuv txiv tsuas yuav muab tau niam nkauj kaus coj los cob lis nkaus rau neb txiv tuam mej koob lwm mej koob tej quav npab ces yuav tshov lim txog neb txiv tuam mej koob lwm mej koob ua zoo mus txoj tas kuv niam kuv txiv nkauj nyab nraug tub liaj lwg rhwv mim txoj mus kev nyab.

Zoo li kuv niam kuv txiv tsuas yuav muab tau niam nkauj kaus coj los cob nkaus rau neb txiv tuam mej koob lwm mej koob tej mus quav tes ces yuav tshov lim txog neb txiv tuam mej koob lwm mej koob ua zoo mus txoj tas kuv niam kuv txiv nkauj nyab nraug tub liaj lwg rhwv mim txoj mus kev sev no yuas.

9. Zoo li neb ua siab lis ntev mus muab kuv niam kuv txiv nkauj nyab nraug tub liaj lwg rhwv mim tus caj tshoob ntos mus kom kawg siab, ntsig kos ntos mus kom kawg ntsis nyaj neb tus txiaj ntsha los kuv niam kuv txiv yuav nco mus ib txhiab neb tus txiaj ntsig los kuv niam kuv txiv yuav nco mus ib txhis no.

- Zoo li neb ua siab lis ntev mus muab kuv niam kuv txiv nkauj nyab nraug tub liaj lwg rhwv mim tus caj tshoob ntos mus kom kawg ntsis tus ntsig kos ntos mus kom kawg siab nyaj neb tus txiaj ntsha los kuv niam kuv txiv yuav nco mus ib txhis neb tus txiaj ntsig los kuv niam kuv txiv yuav nco mus ib txhiab no yuav neb nkawm txiv tuam mej koob lwm mej koob.